Nafta në bursa zbret në 92 USD për fuçi, rrezik nga recesioni

Cmimi i naftës në tregjet ndërkombëtare ka pësuar rënie, duke zbritur deri në 92 dollarë për fuçi. Kjo pasi të dhënat e industrisë treguan se rezervat e arit të zi u rritën më shumë se parashikimet e analistëve, gjatë javës së kaluar, që kanë përforcuar mundësitë për një recesion.

Në anën tjetër, dobësimi i dollarit amerikan ka kufizuar humbjet. Nafta Brent e Londrës për dhjetorin po tregtohet në rreth 92 dollarë për fuçi, ndërsa në sesionin e kaluar ra me mbi 1 dollar. Nafta bruto amerikane po tregtohet pranë nivelit të 84 dollarëve për fuçi.

Referuar të dhënave të Institutit Amerikan të Naftës, rezervat e naftës bruto në SHBA u rritën me 4.5 milionë fuçi, gjatë javës që u mbyll më 21 tetor, ndërsa analistët e anketuar nga Reuters parashikonin një rritje prej 200 mijë fuçi. Megjithatë, investitorët po presin të dhënat zyrtare që do të publikohet më vonë gjatë ditës së sotme, nga administrata për Informimin mbi Energjinë. Ndër zhvillimet e tjera, Shtëpia e Bardhë e mirëpriti vendimin e Arabisë Saudite për të ndihmuar Ukrainën në luftën me Rusinë.

Njëkohësisht, presidenti amerikan, Joe Biden, paralajmëroi se çmimet e naftës dhe benzinës mund të rritenb përpara zgjedhjeve të 8 nëntorit, dhe paralajmëroi Arabinë Saudite se do të përballet me pasoja, për shkak të bashkëpunimit me Rusinë për të ulur prodhimin.