Amnistia fiskale që qeveria ka ndrëmend të zbatojë nuk do të legalizojë çdo burim të ardhurash. Ministrja e Financave dhe Ekonomisë, Delina Ibrahimaj ka deklaruar gjatë konferencës mbi ecurinë e ekonomisë për 8-mujorin se kjo nismë synon legalizimin e të ardhurave të emigrantëve, por jo parave që rrjedhin nga çdo burim dhe as legalizimin e ndërtimeve të paligjshme.
“Nga pyetësori i popullatës, mbi 60% e popullatës u shpreh se ishte pro amnistisë fiskale dhe penale me qëllim legalizimin e të ardhurave të emigrantëve. Ky ligj vepron brenda kufijve të Shqipërisë dhe do të aplikohet për qytetarët shqiptarë. Sa i përket nëse do të legalizojë çdo burim, nuk mund të ketë legalizime të një ndërtimi të paligjshëm. Ka filluar si proces shumë kohë përpara se të merreshin nismat ligjore”, u shpreh ministrja.
Ajo shtoi se qeveria po punon ende për projektligjin e aministisë fiskale, për të dërguar një draft sa më të plotë në Parlament. “Kemi punuar intensivisht, jemi ende në fazën e konsultimit. Kemi bërë disa konsultime publike, qoftë me grupet e interesit, qoftë partnerët ndërkombëtarë, që po vijojnë duke marrë parasysh rekomandimet më të mira, në mënyrë që ky ligj të arrijë qëllimin për të cilin po krijohet. Nuk e kam një përgjigje kur do të realizohet, jemi ende duke e punuar draftin dhe aktet nënligjore”, deklaroi Ibrahimaj.
Ministrja shpjegoi gjatë konferencës se ekonomia ka performuar mirë, veçanërisht sektorë si turizmi, ndërtimi dhe tregtia. Gjithashtu, është shtuar numri i bizneseve të reja dhe niveli i të ardhurave.
