Në kulmin e debatit publik për inceneratorët, me akuza për abuzime me kontrata dhe fondet, INSTAT ka publikuar të dhënat për përpunimin e mbeteve në vend. Nga statistikat zyrtare rezulton se vetëm 2% e totalit të mbetjeve në vend janë trajtuar nga inceneratorët.
Në total gjatë vitit 2021 janë menaxhuar 875.105 mijë tonë mbetje urbane ose ndryshe janë 311 kg për banorë. Gjatë vitit 2020 sasia e mbetjeve të menaxhuara ishte 369 kg për banor. Pjesa më e madhe e tyre ose rreth 79% janë depozituar nëpër landfille ose fusha mbetjesh të miratuara si depozita të përkohëshme nga bashkitë përkatëse. Ndërkohë, mbetjet e trajtuara me djegie ose e njohur ndryshe si incenerim zënë vetëm 2% të mbetjeve të menaxhuara gjithsej.
Nëse do të flisnim për përbërjen e mbetjeve urbane të menaxhuara, përgjatë vitit 2021, nga të dhënat shihet se pjesën më të madhe e zënë mbetjet organike, me 58.6% të peshës. Ndiqen nga mbetjet plastike dhe materialet prej letre ose kartoni me 8.7% dhe 8.5% respektivisht. Inertet pasojnë në renditje me një peshë prej 6.3%. Përsa i përket origjinës gjeneruese, 86.2% janë mbetje tipike familjare ose mbetje të ngjashme me to, ndërsa 13.8% janë mbetje industriale të menaxhuara bashkë me ato urbane.
