LIGJET E BIZNESIT
Të gjitha vendet e rajonit po përshpejtojnë procesin e dixhitalizimit të shërbimeve publike, për t’iu shërbyer më mirë dhe më shpejt qytetarëve dhe biznesit. Madje, dixhitalizimi i shërbimeve publike është një rrugëtim, ku vendet në rajon po lëvizin në sinkron, jo vetëm në emër të qytetarëve të tyre, por edhe për një bashkëpunim më të mirë rajonal.
Lëvizja Mjaft ka mbledhur të premten përfaqësues të institucioneve publike të angazhuara në këtë drejtim nga 6 vendet e rajonit në emër të dialogut për agjenden dixhitale. E pranishme në takim, Milva Ekonomi, Ministre e Shtetit për Standardet dhe Shërbimet përmendi si një prej efekteve më pozitive të dixhitalizimit, luftën kundër korrupsionit.
Shqipëria ka ecur më shpejt nga të gjithë vendet në procesin e kalimit te shërbimet online, ndërkohë që edhe Serbia e Maqedonia kanë dixhitalizuar një pjesë të mirë të tyre.
