Rritja e çmimeve, shqiptarët më të goditurit në rajon

Në gusht, inflacioni, treguesi që dëshmon për rritjen e çmimeve kapërceu në 8%, niveli më i lartë që prej periudhës së piramidave. Rritja e inflacionit u shkaktuar kryesisht nga shtrenjtimi i ushqimeve me 14% rritje dhe karburanteve, reflektuar në grupin transport me 19.3% rritje.

Sipas të dhënave të Institutit të Statistikave, një familje shqiptare shpenzon për ushqim 41.6% të buxhetit mujor. Rritja e çmimit të ushqimeve do të thotë se kjo peshë në buxhetin e tyre ka ardhur duke u rritur. Shifra që i duhet një familje shqiptare për t’u ushqyer është më e larta se në të gjitha vendet e rajonit. Në Maqedoninë e Veriut, një familje shpenzon vetëm 30.6% të të ardhurave mujore për ushqim, në Bosnje- Hercegovinë 29.5%, në Malin e Zi 24%.5 dhe në Serbi 23.6%. Të dhënat për Kosovën mungojnë, ndrëkohë që në Bashkimin Europian, pesha e ushqimit në buxhetin mujor të një familje është vetëm 13%.

Sa më shumë të zërë pesha e të ushqyerit në buxhetin familjar aq më i varfër është ai vend. Të dhënat e mësipërme tregojnë qartë se shqiptarëve do iu duhen më shumë para për t”u ushqyer e në kushtet kur të ardhurat mbeten të njëjta, duhet të heqin dorë ga shpenzime të tjera.