Arrin në rreth 124 milionë euro stoku I detyrimeve të prapambetura. bëhet fjalë për pagesa që qeveria duhet t’u bëjë kompanive private për punë publike të kryera. Sipas të dhënave nga Ministria e Financave, stoku shënoi vlerën e 15 miliardë lekëve në fund të qershorit. Kundrejt fundit të vitit të kaluar, është shënuar një rritje e detyrimeve të papaguara me 1.6 miliardë lekë ose 12.5 për qind më shumë se ne janar të këtij viti. Në krahasim me qershorin e vitit 2021, stoku i detyrimeve është ulur me rreth 12 për qind.
Rritja e detyrimeve është krijuar nga punimet në infrastrukturë, për të cilat buxhetit i shtetit u detyrohet kompanive private me 5.1 miliardë lekë me një zgjerim 9.6 për qind nga fillimi i vitit.
Zëri “detyrime të tjera” që zakonisht përbehet nga detyrimet e pushtetit lokal dhe vendime të gjykatave të brendshme shënoi një stok detyrimesh me 9,8 miliardë duke u zgjeruan me 14 për qind në raport me fundin e vitit. Pjesa më e madhe në këtë zë e zëne janë vendimet e gjykatave të te brendshme për shkarkime të padrejta nga puna të punonjësve në administratën publike.
Raportimet e Ministrisë së Financave nuk përfshijnë vendimet e gjykatave të huaja për çështjet në arbitrazh. Krijimi i detyrimeve të prapambetura ka qenë një problem i përhershëm i të gjitha qeverive, që krijohet kryesisht nga problemet e qeverisë me fondet, por në disa raste edhe me situacionet e kompanive private.
