LIGJET E BIZNESIT
Biznesi po përballet me shtrenjtim të kostove, çka paralajmëron rritje të mëtejshme të çmimeve në treg. Sipas të dhënave të Institutit të Statistikave, në sektorin e ndërtimit kostot kanë vijuar rritjen e ndjeshme dhe në tremujorin e dytë të vitit. Indeksi i Kushtimit në Ndërtim, arriti në këtë periudhë në 107,8 kundrejt tremujorit të katërt 2020 që merret si periudhë bazë. Ndryshimi vjetor i Indeksit të Kushtimit në Ndërtim në tremujorin e dytë të këtij viti është 6.2%, ndrësa një vit më parë ky ndryshim ishte 1,3%. Tendenca është ndikuar nga shtrenjtimi i energjisë elektrike dhe lëndëve të para. Një ecuri e tillë e kostove sinjalizon shtrenjtim të mëtejshëm të çmimeve të apartamenteve.
E njëjta tendencë është shënuar dhe për prodhuesit, që po shohin kosto 20.5% më të shtrenjta se një vit më parë. Rritja me e madhe e çmimeve prej 44,9% vërehet në seksionin “Industri nxjerrëse” pasuar nga seksionet “Energjia elektrike, gaz, avull dhe me ajër të kondicionuar” me 28,5%. Indeksi i Çmimeve të Prodhimit në seksionin “Industri përpunuese” ka shënuar rritje me 16.9%.
Rritje kanë pësuar edhe cmimet e mallrave të importet, me 10.7% më shumë se në tremujorin e dytë të një viti më parë. Sipas Institutit të Statistikave, Indeksi i Çmimeve të Importit, në tremujorin e dytë të vitit 2022, arriti 112.1 kundrejt vitit 2020.
Çmimet e importit të produkteve në seksionin “Energjia elektrike, gazi, avulli dhe ajri kondicionuar” kanë shënuar rritje me 73.5%. Indeksi në seksionin “Industria përpunuese” me peshën më te madhe prej 91.4% shënoi një rritje me 8.4%.
