Bizneset që instalojnë panele diellore për të vetëprodhuar energji elektrike do të kompensohen për tepricën që hedhin në rrjet. Zv.ministri i Infrastrukturës dhe Energjisë, Ilir Bejtja, deklaroi për A2 Business në A2 CNN, se ndryshimet e nevojshme për të zgjidhur këtë ngërç të kërkuar prej vitesh nga sipërmarrja, do të realizohen brenda këtij viti.
“Pjesa e shpërblimit të tepricave të energjisë, do të jetë e mundur brenda këtij viti. Miratohet ligji për energji të rinovueshme, miratohet vendimi i qeverisë për kontratën për diferencë dhe formula e shpërblimit të tepricave të energjisë”, tha zv.ministri, Bejtja.
Sipas të dhënave të Sekretariatit të Komunitetit të Energjisë, Shqipëria ka së paku 249 biznese që vetëprodhojnë një pjesë të energjisë që ata konsumojnë, të dytët në rajon vetëm pas Maqedonisë së Veriut.
Biznesi kishte kërkuar gjithashtu rritjen e kapaciteteve të instaluara mbi 0.5 MW, që është kufiri maksimal që lejon ligji. Por ministria e ka refuzuar me argumentimin se është një nga limitet më të mëdha në Europë. Bejtja ndërkohë i kërkoi bizneseve të shohin mundësinë për të përdorur energjinë natën, pasi ka një kosto më të lirë.
