LIGJET E BIZNESIT
Qeveria do të prezantojë të enjten paketën e masave për të përballuar krizën energjetike. Lajmi u bë i ditur nga ministrja e Infrastrukturës dhe Energjisë, Belinda Balluku pas mbledhjes së qeverisë. Ajo ka deklaruar se nesër do të prezantohet paketa për energjinë, me propozimet konkrete, ku do të mësohet edhe sa do të jetë cmimi për familjet që konsumojnë mbi 800 kwh në muaj.
Përvec rikthimit të faturimit me 2 fasha, plani i masave pritet të parashikojë ndërhyrje të tjera për kursimin e energjisë nga qytetarët dhe bizneset. Kursim energjie do të kërkohet edhe për institucionet shtetërore, praktikë që po ndodh edhe në vendet e tjera europiane, që gjithashtu, po përballen me krizë energjetike.
Ndërkohë nga 1 tetori, në terren do të zbresë Task-Forca e posaçme për energjinë, që do të inspektojë ndërhyrjet e paligjshme në rrjet ose siç njihen ndryshe, vjedhjet e energjisë. Gjatë komunikimit të posaçëm për energjinë ditën e nesërme, kryeministri dhe ministrja Balluku pritet të shpallin edhe masat për të nxitur diversifikimin e prodhimit të energjisë, kryesisht paneleve diellorë (fotovoltaikëve).
