LIGJET E BIZNESIT
Qeveria dhe biznesi do të jenë të detyruar të indeksojnë pagat e punonjësve të tyre. E thënë ndryshe, t’i rrisin ato sa inflacioni (rritja e cmimeve). Në Kuvend është dorëzuar projektligji “Për indeksimin e pagës së punonjësve dhe nëpunësve në Republikën e Shqipërisë”, i cili synon përcaktimin e rregullave të unifikuara për indeksimin e pagave të punonjësve dhe nëpunësve të administratës publike rregullisht, për të garantuar qendrueshmërinë e të ardhurave të tyre. Por njëkohësisht të bëhet një lidhje e treguesve të ekonomisë me pagat. E thënë ndryshe, çdo vit të këtë një ndryshim të nivelit të pagave me një përqindje që merr parasysh rritjen reale të ekonomisë dhe rritjen e çmimeve. Nëse ka rritje reale negative të ekonomisë, atëhere duhet të bëhet vetëm indeksim.
Në relacionin shoqërues të draftit theksohet se rritja e fundit e pagave të administratës publike është bërë në muajin mars të vitit 2017. Niveli i pagës sipas kategorive për punonjësit e rregulluar sipas statusit të nëpunësit civil dhe të klasave për punonjësit e rregulluar me Kodin e Punës nuk kanë ndryshuar në periudhën 2021- 2018 dhe as në vitin 2022. “Përfituese e rritjes së pagave në sektorin publik në periudhën 2021-2019 ka mbetur një kategori e caktuar, si arsimi dhe shëndetësia. Përsëri për këto dy kategori në vitin 2022 pati një rritje të pagës sipas Ligjit të Buxhetit në masën 6 për qind. Po për këtë vit është planifikuar rritje e pagës dhe për punonjësit e Ministrisë së Mbrojtjes. Ndërsa pjesa tjetër e administratës publike është e penalizuar, duke mos as u indeksuar dhe as rritur niveli i pagës”, theksohet në relacion.
Nisma ligjore pritet të diskutohet fillimisht në komisionet parlamentare dhe më pas, të kalojë për miratim në seancë plenare.
