Qeveria do të japë 6.1 miliardë lekë për të përballuar krizën ekonomike. Shifra është bërë e ditur nga ministrja e Financave, Delina Ibrahimaj në komisionin parlamentar të Ekonomisë, ku ëhstë diskutuar për aktin normative të rishikimit të buxhetit. Ajo ka shpjeguar se kjo ndihmë që do të alokohet në formën e paketës së dytë të Rezistencës Sociale do të mbështesë rritjen ekonomike, që për këtë vit pritet të jetë mbi 3.2%.
“Ky akt normativ i përgjigjet krizës së energjisë dhe të çmimeve. Fokusi është akomodimi i mbështetjes për kategoritë. Synimi është shtrirja në kohë e paketës për të përballuar rritjen e çmimeve. Janë 6.1 miliardë lekë që do të përdoren për paketën. Ndërkohë kemi rritur pritshmëritë për të ardhurat dhe kemi ulur pritshmëritë për deficitin buxhetor. Rritja ekonomike për vitin 2022 do të jetë më shumë se 3.2%”, u shpreh Ibrahimaj.
Ministrja e Financave bëri të ditur se shpenzimet do të rriten me 13 miliardë lekë dhe ato do të fokusohen më së shumti për të përballuar rritjen e çmimeve, si dhe do të reduktohet deficiti buxhetor me 17 miliardë lekë.
“Parashikohen masa për të ndihmuar familjet përballë çmimeve, janë parashikuar fonde për kontratat publike. Reduktohet deficiti buxhetor me 17 miliardë lekë, duke e ulur në nivelin e 84 miliardë lekë, deficiti do të jetë sa 4.2% e PBB-së nga 4.5% që ishte. Limiti i huamarrjes është 33 miliardë lekë dhe jo 50 miliardë. Borxhi publik do të jetë 70.1% e PBB-së, por parashikimet janë pjesë e rishikimeve pasi mund të kemi ulje të borxhit nëse kursi vijon i tillë”, ka deklaruar ministrja.
Pas diskutimit në Komisionin parlamentar të Ekonomisë, akti normativ i rishikimit të buxhetit pritet të kalojë për miratim në seancë plenare.
