LIGJET E BIZNESIT
Kanë nisur sot aplikimet për financimin e kultivimit të grurit në vend. Ministrja e Bujqësisë, Frida Krifca ka bërë të ditur se deri më tani kanë aplikuar 740 fermerë nga i gjithë vendi, për një sipërfaqe prodhimi prej 6.550 hektarë, me një angazhim të buxhetit të vënë në dispozicion që në ditën e parë të thirrjes, prej 20%.
Sipas ministres, Fieri, Korça, Shkodra, Vlora janë qarqet me aplikimet më të larta deri më tani. Bëhet fjalë për një skemë që siguron mbështetje financiare prej 30 mijë lekë për hektarë, për sipërfaqe jo më pak se 1 hektarë. Fondi total i akorduar nga qeveria për të nxitur prodhimin e grurit në vend si masë parandaluese ndaj tranzicionit të tregjeve ndërkombëtare për shkak të luftës Rusi-Ukrainë është 500 milionë lekë.
Për të përfituar, aplikanti duhet të jetë i pajisur me NIPT fermeri aktiv; toka të jetë në pronësi ose në përdorim (qira, huapërdorje etj.); të ketë faturë të fiskalizuar për blerjen e farës dhe plehrave kimike. Ministria e Bujqësisë synon që sipërfaqja e kultivuar me grurë për vitin që vjen të arrijë në 70. 000 ha në total. Aktualisht në vend prodhohen mesatarisht 233 mijë ton grurë, ndërsa importohen mbi 221 mijë ton.
