Inflacioni zhvlerëson rritjen e pagave, zero të ardhura shtesë për familjet

Rritja e ndjeshme e çmimeve ka zhvlerësuar rritjen e pagave të konstatuar në tremujorin e dytë të këtij viti. Sipas të dhënave të Institutit të Statistikave, paga mesatare mujore bruto për një të punësuar me pagë gjatë tremujorit të dytë 2022, është 60.666 lekë, duke u rritur me 7,0 % krahasuar me të njëjtin tremujor të vitit të kaluar.  Në të njëjtën periudhë inflacioni mesatar ishte 6.8%, sipas INSTAT (6.2% në prill, 6.7% në maj dhe 7.4% në qershor), çka bën që rritja reale e pagave të ketë qenë pothuajse zero në të njëjtën periudhë. Ndërkohë që në korrik dhe gusht, inflacioni u rrit më tej, duke kapërcyer në 7.5% dhe 8% dhe duke qenë më i lartë se rritja e pagave të tremujorit të dytë.

Nga ana tjetër, vlen të përmendet se rritja e pagave mund të reflektojë edhe formalizimin që është bërë në këtë sektor, pas aksionit të tatimeve që nisi pasi u bë publike databasa e të dhënave të pagave, ku u konstatua edhe informalitet i lartë.

Profesionet që paguhen më shumë

Instituti i Statistikave konstaton se sektori financiar ka pagat më të larta. Sipas INSTAT, gjatë tremujorit të dytë 2022, paga mesatare mujore bruto për një të punësuar me pagë në sektorin e Aktiviteteve financiare dhe të sigurimit është 2.16 herë më e lartë sesa mesatarja në nivel kombëtar, ndërsa në grup-aktivitetin e “Bujqësi, pyje dhe peshkim” është 34 % më e ulët.

Krahasuar me të njëjtin tremujor të vitit të kaluar, gjatë tremujorit të dytë 2022 paga mesatare bruto për aktivitetin e Ndërtimit, ka rritjen më të madhe prej 13,4 %, ndërsa rritjen më të vogël e ka grup-aktiviteti i Administratës publike dhe mbrojtjes; sigurimi social i detyrueshëm; arsimi; shëndetësia dhe aktivitete të punës sociale prej 0,1 %.

Gjatë tremujorit të dytë 2022, paga mesatare mujore bruto, për një të punësuar në grup-profesionin e menaxherëve, ligjvënësve, nëpunësve të lartë të administratës shtetërore dhe drejtorëve ekzekutivë është 68.4 % më e lartë sesa mesatarja në nivel kombëtar, ndërsa në grupin e Punëtorëve (Profesione elementare) është 36.3 % më e ulët.

Krahasuar me të njëjtin tremujor të vitit të kaluar, gjatë tremujorit të dytë 2022, paga mesatare mujore bruto për grup-profesionin e Punonjës të montimit dhe përdorimit të makinerive dhe pajisjeve ka rritjen më të madhe prej 14.8 %, ndërsa rritjen më të vogël e ka grup-profesioni i Forcave të Armatosura prej 0.2 %.