Forcohet euro, mbarojnë efektet sezonale

Euro ka fituar pikë në kursin e këmbimit, duke e mbyllur javën me rritje kundrejt lekut. Sipas kursit zyrtar të këmbimit të Bankës së Shqipërisë, monedha Europiane u këmbye të premten me 117.81 Lekë, në rritje me 0.71 pikë në raport me fundin e javës së kaluar. Agjentët e këmbimit valutor mendojnë se rritja e euros i detyrohet kryesisht zbehjes së efektit sezonal në kursin e këmbimit valutor.

Këtë verë, euro preku nivelet më të ulëta historike në kursin e këmbimit me Lekun, edhe për shkak të shifrave rekord që regjistroi turizmi hyrës në vend. Në fund të muajit korrik, monedha europianezbriti deri në nivelin e 116.6 Lekëve, niveli më i ulët i regjistruar ndonjëherë.

Me fillimin e muajit shtator, intensiteti i sezonit turistik është në rënie dhe prurjet valutore të lidhura me të gjithashtu. Kjo do të thotë se pakësohet sasia e euros në qarkullim dhe rivenosen ekuilibrat në treg.