LIGJET E BIZNESIT
Kriza energjetike do t’i kushtojë buxhetit të shtetit 500 milionë euro. Shifra është dhënë nga kryeministri Edi Rama në konferencën përfundimtare për shtyp në Beograd, pas Samitit të Open Balkan.
“Ky dimër, ka gjasë të jetë më i vështiri që kemi hasur në këto vite, ka plane në Europë që përfshijnë mbylljen e dritave pas orës 10, që do të thotë mbyllje aktivitetesh, njësoj si në kohën e pandemisë, por kësaj radhe për energjinë elektrike. Kemi diskutuar sesi do të bashkëpunojmë, dhe do të jenë hapa konkrete”, deklaroi Rama.
Ai shtoi se “në Shqipëri kemi marrë një vendim, që nuk e di a është i çmendur, për mos të prekur çmimin për konsumatorët familjarë dhe biznesin e vogël, kemi mbajtur çmimin që ishte përpara se të shfaqej kriza. Por kjo do të thotë qindra miliona euro për të mbuluar koston. Çështja është sa gjatë do të vazhdojë kjo histori, ndërkohë që mund të kesh paratë por jo energjinë, prandaj behën këto bashkëpunime”.
Ndihma e Bashkimit Europian është e domosdoshme, por kryeministri edhe një herë “thumboi” Brukselin, duke e ftuar që mos të përsërisë me Ballkanin Perëndimor gabime të mëparshme.
“I kërkoj BE-së që mos të bëj me ne turpin që bëri në kohën e pandemisë, kur u detyruam të kërkojmë në Kinë, dhe e kanë pranuar vetë liderët e BE-së. Do t’i kërkojmë BE-së mbështetje ekstra, parashikimet e kostove janë marramendëse, për Shqipërinë arrijnë afër 500 milionë euro për të mbajtur sistemin dhe të vazhduar furnizimin me energji, shpresoj që BE të na dëgjohen dhe të jemi edhe ne pjesë”, deklaroi Rama, që shtoi se një nga marrëveshjet ka të bëj me ngritjen e Agjencisë së Ballkanit të Hapur për Investimet e Huaja, që sipas tij do të jetë “ombrella” e agjencive të vendeve pjesëmarrëse.
