Çelet gara për bizneset me ide inovatore që duan të zgjerojnë aktivitetin e tyre. Ata mund të përfitojnë nga grantet me vlerë deri në 2.5 milionë lekë.
Agjencia Shqiptare e Zhvillimit të Investimeve ka hapur thirrjen për aplikime për sipërmarrjet që kanë interes të digjitalizojnë biznesin tërësisht apo pjesërisht, të integrojnë teknologji të reja apo të krijonë platforma të reja, si aplikacione për shërbim klienti apo menaxhim të dhënash.
Gjithashtu, mbështeten bizneset që kanë nevojë të ndërtojnë një faqe ëeb-i apo platformë online për marketingun e kompanisë, që duan të përmirësojnë ndërlidhjen me klientët, apo që duan të blejnë aplikacione dhe paketa të ndryshme të programeve kompjuterike në mënyrë që të jenë konkurruese edhe me ndërmarrjet e tjera brenda dhe jashtë vendit.
Ky grant do të mbështesë aplikuesit ndërmarrjet mikro, të vogla dhe të mesme, nëpërmjet thirrjes për propozime për bashkëfinancimin e kostove të pranueshme (subvencionimi) me fokus transformimin dixhital të proceseve kryesore të biznesit.
Granti në fjalë mbështet projektet aplikuese në 80% të kostove, por jo më shumë se 2,500,000. Aplikantët do të kenë afat deri më datën 21 tetor 2022 për të dorëzuar dokumentet dhe projektet e tyre dhe shpallja e fituesve do të bëhet brenda datës 30 Nëntor të këtij viti. Aplikimi dhe dorëzimi i dokumenteve kryhet online nëpërmjet adresës së email-it: [email protected].
