Krimet në familje, kryesisht ndaj vajzave dhe grave mbeten shqetësim në Shqipëri dhe jo vetëm. Por të dhënat zyrtare tregojnë se ka një reagim më të fortë ndaj ngjarjeve të tilla, të cilat tronditin opinionin publik. Sipas dokumentit të Ministrisë së Financave, “Buxheti 2022, një vështrim për qytetarët” rezulton se ka një vëmendje të shtuar ndaj grave dhe familjeve vitet e fundit. Kështu, ka pasur një reduktim të kohës së reagimit ndaj krimeve të dhunës në familje nga 16 minuta në vitin 2021 në 14 minuta këtë vit.
Gjithashtu, është rritur numri i masave të menjëhershme mbrojtëse për gratë dhe vajzat e dhunuara në masën 2%. Sipas të dhënave, në vitin 2021 kishte 2.700 masa të menjëhershme mbrojtëse, teksa në vitin 2022 kjo shifër ka arritur në 2.750. Përmirësimi i mëtejshëm i këtyre treguesve mbetet sfidë e përcaktuar në buxhet për periudhën në vijim.
Mbrojtja më e mirë ndaj grave dhe familjes është mundësuar falë asistencës së Un Women, që është e përqëndruar në sigurimin e barazisë gjinore në Shqipërisë, me qëllim që burrat dhe gratë të kenë mundësi të barabarta dhe akses të barabartë për të njëjtat të drejta dhe përfitime.
Të dhënat tregojnë se si rezultat i ndryshimeve ligjore dhe institucionale, si dhe mbështetjes teknike të OKB-së “Gratë, Buxhetimi i Përgjegjshëm Gjinor” në Shqipëri ka qenë një histori suksesi që nga fillimi i tij në 2012. Gjatë këtyre viteve ka pasur një rritje të ndjeshme të numrit të programeve buxhetore që përfshijnë në mënyrë efektive objektivat e lidhura me barazinë gjinore, nga 9 programe në vitin 2015 në 45 programe në vitin 2020. Rritje të ndjeshme ka pësuar edhe shuma e fondeve e vënë në dispozicion për çështjet e barazisë gjinore, që ka arritur aktualisht në 9% të Prodhimit të Brendshëm Bruto.
