Lufta në Ukrainë arrin ditën e 187-të, ndërsa sulme të reja janë raportuar në Donetek. Nga sulmi në fjalë thuhet se kanë humbur jetën 8 persona.
Lidhur me sanksionet e reja kundër Kremlinit, Borrell deklaroi se: “Është e vështirë për të gjithë BE-në të japë miratimin për shtrëngimin e vizave ruse”. Ndërkohë, Kievi zyrtar pohon se në orët e fundit janë regjistruar më shumë se 200 sulme në rajonin e Zaporizhzhia, ku ekziston rreziku i “rrjedhjes së substancave radioaktive” nga centrali. Ky fakt konfirmohet nga kompania kombëtare ukrainase për prodhimin e energjisë bërthamore.
Misioni i Agjencisë Ndërkombëtare të Energjisë Atomike do të arrijë në termocentralin bërthamor të Zaporizhzhia deri në fund të kësaj jave. Kështu ka bërë të ditur drejtori i përgjithshëm i IAEA, Rafael Grossi. “Ushtria ruse duhet të largohet nga uzina: ata nuk kanë çfarë të bëjnë atje”, shkroi në Twitter ministri i Jashtëm ukrainas Dmytro Kuleba. Nga ana tjetër, presidenti Zelensky u zotua se Ukraina do të marrë të gjitha territoret e pushtuara nga rusët. “Ne do të marrim përsëri të gjitha territoret e pushtuara nga rusët”, tha ai.
