Një krim i rëndë ka ndodhur mbrëmjen e djeshme në Lezhë, në fshatin Grykë Zezë, ku babë e bir, Pjeter dhe Gent Perjaku janë vrarë në banesën e tyre nga ish-dhëndri.
Besnik Pjetri është autori i krimit të dyfishtë, ndërsa dyshohet se konflikti ka nisur pas divorcit që ky i fundit ka marrë nga bashkëshortja.
Autori kishte dy fëmijë nga martesa me vajzën e viktimës, ndërsa jetonin më herët në Itali. Ata thuhet se vazhdimisht kanë pasur konflikte me njëri-tjetrin, për çështje ekonomike. Ndërkohë viktimat sapo ishin kthyer nga Italia në banesën e tyre në Lezhë.
Sipas policisë autori i dyshuar është larguar menjëherë nga vendi i ngjarjes pas krimit, ndërsa policia është vënë në ndjekje të tij.
Grupi hetimor në vendngjarje vazhdon punën hetimore për zbardhjen e plotë të rrethanave të ngjarjes.
