Florian Marku ka sfiduar Miguel Parra Ramirez për titullin vakant “WBC Silver Interim Welter” në arenën gjigante në stadiumin “Air Albania”, në një natë magjike boksi.
Një ndeshje e fortë mes dy luftëtarëve të vërtetë është zhvilluar në ring dhe pas 10 raundeve asnjë nga boksierët nuk është dorëzuar.
I mbështetur nga fansat e shumtë kuqezi, “Mbreti Shqiptar” ka mposhtur rivalin meksikan me pikë, me vendim unanim, ndeshjen e parë të zhvilluar në shtëpinë e tij, në sfidën më të rëndësishme të karrierës së tij, duke koleksionuar fitoren e 12-të në karrierë.
Meksikani ka nisur më mirë dy raundet e para, por Marku ka fituar terren dhe ka dominuar raundet pasardhëse. Pas përfundimit të 5 raundeve të para boksieri shqiptar kryesonte me pikë.
Ndonëse meksikani e hodhi në tapet në një moment, boksieri lushnjar nuk u dorëzua. Marku u rikthye duke dëmtuar keqazi rivalin meksikan, i cili mori një çarje në fytyrë. Edhe dy raundet e fundit, folën për boksierin tonë, i cili fitoi titullin e dytë të rëndësishëm WBC Silver, pak muaj pasi kishte fituar edhe IBF International.
