Çfarë kanë pikasur hetuesit? Ja pista kryesore e atentatit me dy të v rarë në Vlorë

Ditën e djeshme Vlora u trondit nga një atentat që i mori jetën dy personave.

Ngjarja ndodhi në afërsi të mbikalimit të Panajasë.

Për hetuesit pista kryesore e vrasjes së Geno (Shpati) Lena dhe Hakim Xhezo është ajo e hakmarrjes për shkak të së shkuarës së viktimave.

Megjithëse ende herët për të arritur një konkluzion, hetuesit kanë edhe një pistë të dytë që lidhet me konfliktet e viktimave për shkak të dyshimeve për përfshirje në pazare droge. Përpos kësaj, viktimat i druheshin eliminimit të tyre pasi qarkullonin vazhdimisht me makina të blinduara, por sot nuk ishte rasti dhe një “shpërqendrim” i vogël i tyre nga masat e zakonshme të sigurisë, ka bërë që ata të vriten pa mëshirë me breshëri plumbash.

Nga kush u tradhtuan Hakim Xhezo dhe Shpati Lena? Ashtu sikurse edhe në atentatin e pak javëve më parë në Fushë-Krujë ku mbeti i vrarë Brilant Martinaj, i cili atë ditë udhëtoi me një automjet të zakonshëm, edhe në atentatin e djeshëm, viktimat nuk ishin në automjete të blinduara dhe për pasojë, eliminimi i tyre është kryer pa vështirësi nga ana e autorëve që dyshohet të jenë vrasës me pagesë.

Ata kanë shfrytëzuar këtë moment për të arritur qëllimin e tyre dhe ka dyshime të forta se mund të jenë informuar nga persona që kanë pasur kontakte dhe njohje me viktimat. Ka dyshime të forta se autorët kanë pasur dijeni për itinerarin e 37 dhe 34-vjeçarit, duke ngritur edhe pistën te mbikalimi në dalje të fshatit Panaja nga ku kalon edhe aksi nacional.

Atentatorët shfrytëzojnë pikërisht këto akse për të arritur qëllimet e tyre dhe jo rrallë edhe në mes të ditës siç ndodhi në dy atentatet e fundit, të Vlorës një ditë më parë dhe të Fushës-Krujës më 17 korrik.