Policia britanike ka nisur një operacion për të gjurmuar dhe kapur trafikantët shqiptarë të cilët po përpiqen të rekrutojnë bashkatdhetarët e tyre në trafikun e drogës dhe në bandat e krimit të organizuar.
Policia është duke hetuar gjithashtu edhe zhdukjen e shumë prej azilkërkuesve shqiptarë të cilët janë larguar nga hotelet ku ishin vendosur nga autoritetet britanike.
Operacioni ‘Rosewood’, i cili drejtohet nga policia e West Yorkshire, po heton mënyrat se si grupet e krimit të organizuar, veçanërisht në veri të Britanisë së Madhe po rekrutojnë shqiptarët dhe azilkërkuesit vietnamezë për t’i përfshirë ata në fermat e kanabisit apo në punë të tjera kriminale.
Sipas policisë britanike, po bëhet e pamundura për gjetjen e të larguarve por edhe për të hartuar programe mbrojtëse ndaj azilkërkuesve që mund të bien pre e grupeve kriminale.
Ndërkaq organizatat bamirëse të refugjatëve kanë bërë të ditur se shqiptarët dhe vietnamezët janë ata që bien më shumë pre e trafikantëve që u ofrojnë punë në fermat e kanabisit. Gjithashtu, gratë vietnameze janë në shënjestër të këtyre grupeve, shkruajnë mediat britanike.
Më shumë se 35 mijë azilkërkues jetojnë në hotele, duke u kushtuar taksapaguesve britanikë të paktën 4 milionë paund në ditë, teksa një numër rekord refugjatësh vazhdojnë të kalojnë Kanalin Anglez për të hyrë në Britaninë e Madhe.
