Policia e Vlorës ka dalë me njoftim zyrtar përsa i përket vrasjes së dyfishtë që ndodhi paraditen e sotme në autostradë pranë fshatit Panaja.
Sipas uniformave blu, autorët e atentatit të mirëorganizuar kanë përdorur një automjet tip “BMË” pa targa.
Më pas mësohet se mjeti u gjet i djegur në fshatin Çerven në aksin Levan-Tepelenë.
Brenda tij u konstatuan 3 kallashnikovë.
Ndërsa viktimat që u ekzekutuan nuk janë identifikuar ende.
NJOFTIMI I POLICISË SË VLORËS, ORA 10:50:
Sot, rreth orës 09:50, në dalje të fshatit Panaja, në aksin rrugor Fier-Vlorë, në rrethana ende të pa qarta, dyshohet se janë vrarë me armë zjarri, dy shtetas ende të paidentifikuar, të cilët ndodhen brenda një automjeti tip “Benz”.
Gjatë krehjes së zonës, në fshatin Çerven, në aksin rrugor Levan-Tepelenë, nga shërbimet e Policisë është konstatuar duke u djegur një automjet i braktisur tip “BMË”, pa targa, i cili paraprakisht dyshohet se mund të jetë i autorit/ve të ngjarjes. Nga kqyrja paraprake e automjetit dallohen në brendësi të tij, 3 armë zjarri automatike.
Grupi hetimor nën drejtimin e Prokurorisë së Rrethit Gjyqësor Vlorë ndodhet në vendin e ngjarjes, ku vijon puna për zbardhjen dhe dokumentin e plotë të rrethanave të ngjarjes, identifikimin dhe kapjen e autorit/ve, si dhe identifikimin e dy shtetasve të gjendur pa shenja jete.
Shërbimet e Policisë së DVP Vlorë, Delta Forcës e FNSH-së, në bashkëpunim me DVP Fier kanë ngritur pika kontrolli dhe po krehin zonën për të bërë të mundur kapjen e autorëve.
