“Virulenca shumë e lartë”/ Shtimi i rasteve me virus, mjeku Jorgji: Menjëherë ekzaminim klinik nëse vëreni këto simptoma

Ditët e fundit në vendin tonë janë raportuar raste të shtuara infektimesh me Covid-19, si dhe janë shënuar edhe disa viktima.

Mjeku pneumolog Ardjan Jorgji, i ftuar këtë të shtunë në emisionin “Kjo Javë” në News24 me gazetaren Nisida Tufa, u shpreh se këtë periudhë virulenca është shumë e lartë dhe se duhet treguar kujdes i shtuar.

Ai foli edhe për simptomat më të zakonshme që janë vërejtur këtë periudhë, ndërsa shtoi se nëse për disa ditë keni temperaturë, shtim të kollës apo probleme me frymëmarrjen, duket të bëni menjëherë ekzaminim klinik, dhe jo përmes telefononit.

“Virulenca është e lartë, nëse flasim për situatën aktuale dhe mutacionet në terren, virulenca është shumë e lartë ndaj janë dhe këto shifra. Do bëja një diferencim, direktiva në botë sot është “edhe rrufë të kesh, duhet të provosh që nuk ke Covid”. Sot mund të kesh kollë, teshtima, i ftohur, nga ndryshime të temperaturave, deri dhe nga refluksi, kështu që gama e këtyre simptomave është e gjerë dhe jo e thjeshtë për tu vlerësuar dhe nga një mjek klinicist, kështu që do një kujdes të madh. Karakteristikë sa i përket mutacioneve të Covid në këtë periudhë, janë temperaturat e larta, mbi 38 që mund të shkojnë deri në 40 gradë dhe zgjasin deri në 6 ditë, dhimbje koke, kocke, diarre, kollë të thatë… nëse në vijim shtohet kolla, ndjesi jo e mirë në frymëmarrje apo rëndesë në gjoks, me patjetër ekzaminim klinik dhe jo më vizitë nga telefoni”, tha ai.

Ai sugjeron që për çdo shqetësim apo dyshim, duhet të bëhen testet për Covid-19 dhe të mos neglizhohen.