Një nga vajzat e presidentit Rus Vladimir Putin është emëruar në një pozicion të lartë.
Bëhet fjalë për një organizatë besnike ndaj Kremlinit.
Veprimi ka nxitur spekulimet se ajo po përgatitet për një rol në politikë.
Katerina Tikhonova, 35 vjeçe, u emërua bashkëkryetare e një grupi zyrtarësh të cilët janë ngarkuar me detyrën për të zbutur ndikimin e sanksioneve perëndimore duke reduktuar varësinë e Rusisë nga mallrat dhe teknologjia perëndimore. Sipas analistëve, Rusia është tani vendi më i sanksionuar në botë, duke ia kaluar Iranit dhe Koresë së Veriut.
Ka kohë që spekulohet se 35-vjeçarja Tikhonova, mund të bëhet deputete në partinë në pushtet të Putinit, Rusia e Bashkuar. Ajo njihet më së shumti për dashurinë e saj për kërcimin akrobatik rock’n’roll, një sport i veçantë për të cilin janë dhënë miliona paund nga financime misterioze.
Momentalisht ajo mban një rol drejtues si zëvendësdrejtuese e një qendre kërkimore matematikore në Universitetin Shtetëror të Moskës si dhe drejton fondacionin Innopraktika, i cili vitin e kaluar lançoi një aplikacion për ndarjen e videove që synon të reduktojë ndikimin e mediave të huaja sociale.
Megjithatë, Putin nuk e ka pranuar kurrë publikisht atësinë ndaj Tikhonovës.
Së fundmi u zbulua se Tikhonova ishte në një lidhje me Igor Zelensky , një balerin. Zelensky, i cili nuk ka lidhje me presidentin ukrainas, u detyrua të linte rolin e tij si kreu i baletit shtetëror bavarez, pasi ai refuzoi të dënonte pushtimin e Rusisë.
Tikhonova ishte martuar më parë me Kirill Shamalov, një biznesmen miliarder, babai i të cilit ka lidhje të ngushta me Kremlinin.
