Ekzekutohet djali i ish-presidentit të Hondurasit Porfirio Lobo së bashku me tre miqtë e tij.
Pamjet nga kamerat e sigurisë tregojnë vrasjen me gjakftohtësi nga persona të armatosur të maskuar.
Mësohet se të enjten mbrëma katër miqtë po largoheshin nga një diskotekë në kryeqytetin Tegucigalpa, kur persona të armatosur ndaluan makinën e tyre, i detyruan të dilnin, i vendosën pas një muri dhe më pas i ekzekutuan.
Ish-presidenti Porfirio Lobo ka thënë për mediat vendase se djali i tij Saidi, 23 vjeç, ka vdekur, ndërsa një tjetër nga djemtë e tij, Luis, i cili ishte i pranishëm, por ka hipur në një makinë tjetër më parë dhe tashmë është i sigurt.
Mes viktimave ishte edhe nipi i gjeneralit në pension Romeo Vazquez , lideri i grushtit të shtetit të vitit 2009 që rrëzoi presidentin e atëhershëm Manuel Zelaya. Për pistat e hetimit ende nuk ka asnjë informacion.
Porfirio Lobo, i cili sundoi Hondurasin nga 2010 deri në 2014 – ka një djalë tjetër, Fabio, i cili po vuan një dënim me burg në SHBA për trafik droge. Gruaja e ish-presidentit, Rosa Bonilla , është gjithashtu në burg në Tegucigalpa pasi u dënua për një çështje korrupsioni që u zbulua ndërsa ajo ishte ende zonja e parë.
