“Nuk justifikon pasurinë” KPK heton prokurorin e njohur, ja si i justifikoi 79 mijë eurot e dyshimta

Ditën e sotme prokurori i Vlorës Alfred Sali ka dalë para Komisionit të Pavarur të Kualifikimit.

Ai është hetuar për të treja kriteret, pastërtinë e figurës, aftësitë profesionale dhe justifikimin e pasurisë.

Sipas KPK, zyrtari i lartë ka rezultuar se përsa i takon pasurisë, ka kryer deklarim të rremë si dhe janë konstatuar pasaktësi. Rezulton se Sali në 2014, në deklaratën e pasurisë pretendon se ka fituar në bastet sportive onlinë bet 355 me seli në Gilbraltar shumën prej 79 275 euro.

Ndërsa për një pjesë të kësaj shume prokurori deklaron se ia ka dhënë hua babait të tij në vlerën e 56 mijë eurove. Sipas KPK, edhe pse prokurori ka pasur likuiditet, ka marrë kredi në mënyrë që nuk është arsyetuar qartë.

Shuma e parave e fituar në lojërat e fatit duket e dyshimtë, pasi nuk vjen në harmoni me deklaratat e pasurisë. Nga hetimet e KPK-së, ka rezultuar se ka pasur lëvizje bankare mes prokurorit dhe kompanisë së basteve ku evidentohet se ka qenë frekuentues i kësaj i këtij aktiviteti, duke cenuar figurën dhe integritetin e prokurorit.