Është mbajtur këtë të mërkurë ceremonia e ngritjes simbolike e flamurit të Europës në ambientet e Kryeministrisë, pas çeljes së negociatave për anëtarësimin e Shqipërisë në Bashkimin Europian. I pranishëm ishte kryeministri Rama së bashku me bashkëshorten Linda, ambasadorja e SHBA-së, Yuri Kim si dhe përfaqësues të BE.
Kryeministri Rama u shpreh se 20 korriku, është një ditë e re për Shqipërinë. Ditën e djeshme për Shqipërinë dhe Maqedoninë e Veriut u çelën zyrtarisht negociatat për aderimin në BE.
Rama: Shumë të dashur qytetarë dhe qytetare, shqiptarë dhe shqiptare. Sot është një ditë e re për Shqipërinë dhe ju falenderoj ju që jeni këtu për ceremoninë e ngritjes, pas çeljes së negociatave. Prania juaj këtu është më shumë se një prani protokollare, pasi ju me institucionet që përfaqësoni jeni kontributorë për rrugëtimin e rrugës evropiane të Shqipërisë.
Ngritja e këtij flamuri në selinë e kryeministrisë shënon ngritjen e Shqipërisë në një tjetër nivel. Jo vetëm në marrëdhëniet me BE, por edhe në të ardhmen e saj, me institucionet, liritë dhe të drejtat, sigurinë në çdo drejtim. Ky moment shënon ngritjen në një nivel tjetër detyrimesh të marrëdhënieve të shoqërisë dhe qytetarit shqiptar me rregullat dhe vlerat evropiane.
