Ngjarja në Milot/ Hetimet zbulojnë 3 atentatorë, dy zbritën nga makina dhe qëlluan me breshëri

Pas 17 korrikut, ku 4 atentatorë ende të paidentifikuar dhe të lirë vranë në Fushë Krujë Diklen Vatën, Brilant Martinajn dhe Besmir Hoxhën, dje në Milot përsëri persona mister vranë Klisman Preçin edhe plagosën Ylli Brahimin. Ashtu si 3 viktimat e para pak ditëve edhe i plagosuri i viktima e ditës së djeshme janë emra të njohura për policinë, ndërsa njihen për lidhjen me Ervis Martinajn, i dënuar me 1 vit e 4 muaj burg si i përfshirë në vrasjen e Enton Nikës dhe plagosjen e Ismet Gaxherrit në vitin 2015 në zonën e Linzës.

Sot janë zbardhur detaje të reja për atentatin e ndodhur mbrëmjen e së premtes në Milot. Sipas mediave kanë qenë tre atentatorë, dy prej tyre me armë zbritën dhe qëlluan me breshëri ndaj sheshpushimit të pallatit ku ndodheshin atë moment Ylli Brahimi dhe Klisman Preçi. Hetimet kanë zbuluar se atentatorët kishin qarkulluar disa herë gjatë ditës së djeshme në zonë. Policia ka marrë në pyetje disa persona që mund të kenë dijeni për lëvizjet e viktimave, apo edhe autorëve që mbeten ende të paidentifikuar. Ndërkohë që janë sekuestruar pamjet e kamerave të sigurisë në zonën ku ndodhi ngjarja.