Ish-presidenti Ilir Meta ka shkarkuar dhe përzënë nga Partia e Lirsë, që deri të hënë quhet Lëvizja Socialiste për Integrim, të gjithë kupolën drejtuese të emëruar nga Monika Kryemadhi. Pasi i morri parinë dhe nënkryetar emëroi Agim Neshon, Meta ka bërë dje ndryshime të reja. Komiteti Organizativ i Partisë së Lirisë zgjodhi ditën e djeshme drejtuesit e rinj të strukturave deri në mbledhjen e Konventës Kombëtare. Me propozim të Kryetarit të Partisë së Lirisë, Ilir Meta dhe të Zëvendëskryetarit, Agim Nesho, Komiteti Organizativ zgjodhi dje drejtuesit e rinj të strukturave deri në mbledhjen e Konventës Kombëtare: Tedi Blushi – Sekretar i Përgjithshëm; Endrit Braimllari – Sekretar Organizativ; Floida Kërpaçi – Sekretare për Marrëdhëniet Ndërkombëtare dhe Silva Caka – Sekretare për Marrëdhëniet me Publikun.
Meta prezanton drejtuesit e rinj të Partisë së Lirisë
Më pas, drejtuesit e rinj janë prezantuar gjatë një konference për mediat, edhe kryetari Meta, ndërsa premtoi se lufta kundër korrupsionit do të jetë kryefjala e partisë së drejtuar prej tij. “Gjithçka do të bëhet me zgjedhje, në mënyrë të veçantë për marrjen e të gjitha masave për avancimin e shpejtë të revolucionit antikorrupsion dhe të një aleance të madhe. Me shoqërinë civile, krijimin e strukturave të posaçme, me koordinator në çdo institucion. Tani fillon një punë intensive, për këtë punë duhen dhe disa përgjegjësi dhe përgjegjës në drejtime të ndryshme deri në Konventën që do të mbahet. Me propozimin tim, komiteti miratoi që sekretari do të jetë Tedi Blushi. Ky ekip së bashku me deputetet vlera e të cilëve do të jetë 4 fish pasi një deputet si ata kanë marrë më shumë vota se ata të tjerët e me të gjithë kolegët e tjerë do të kompaksojmë një ekip. Do të jemi shumë bashkëpunues, qëllimi i të gjithë këtij është triumfi i lirisë”, nënvizoi Meta.
Partia e Lirisë sulmon Veliajn
Nga ana tjetër ish-kryetarja e Lëvizjes Socialiste për Integrim, Monika Kryemadhi akuzoi kryebashkiakun e Tiranës se ka kryer një sërë shkeljesh ligjore lidhur me ndërtimin e inceneratorit të Tiranës që në vitin 2016. Në një dalje për mediat, Kryemadhi bëri me dije se i ka dorëzuar dokumentet në Prokurorinë e Posaçme Antikorrupsion dhe në disa ambasada të huaja në kryeqytetin tonë. Sipas saj, Veliaj ka dhënë “ok” për ndërtimin e këtij inceneratori me propozim të pakërkuar duke shkelur ligjin për qeverisjen vendore. “Në 23.06.2016, me shkresën nr. 16/044, shoqëria ‘Integrated Energy BV’ aksionet e së cilës zotërohen nga shoqëritë ‘Energy Recuperator SPA’, ‘Paul Ëurth Italia’ dhe “Integrated Technology Services’, kanë depozituar pranë Ministrisë së Mjedisit një ‘Letër Interesi’, me anën e së cilës ka paraqitur një propozim të pakërkuar për ndërtimin e venddepozitimeve të reja, mbylljen e atyre ekzistuese, ngritjen e sistemit të riciklimit, përmirësimin e infrastrukturës për të mbajtur nën kontroll situatën ndërtimore, për Qarkun Tiranë. Shkresa Nr.16/044 i është drejtuar për dijeni edhe Bashkisë Tiranë. Fakt i cili do të thotë se Bashkia Tiranë që në Qershor të vitit 2016, thënë ndryshe ‘që në krye të herës’ është vënë në dijeni të një propozimi të pakërkuar për ndërtimin e Inceneratorit të Qarkut të Tiranës. Ky projekt koncesionar mund të vihet në jetë vetëm nëse Bashkitë e Qarkut Tiranë (5 bashkitë përbërëse) do të miratojnë financimin e këtij projekti, pasi ato do të jenë përfitueset e projektit të incenerimit të mbetjeve sigurisht kundrejt një tarife të caktuar. Erion Veliaj jep ‘ok’ në parim pa mbledhur Këshillin Bashkiak”, deklaroi Monika Kryemadhi.
