Një 30-vjeçar shqiptar në Angli është dënuar me 100 orë punë pa pagesë pasi u kap në një shtëpi bari në Banbury. Sipas mediave britanike shqiptari Mateo Dedej me profesion kuzhinier nisi punën si kopshtar droge pasi kishte një borxh kokaine dhe mbeti pa punë. Në seancën gjyqësore të tij u tha se shqiptari nën presion të madh nga gangsterët u detyrua të kujdesej për bimët. Shqiptari u u arrestua në fermën e drogës Edmunds Road më 12 maj.
Shtëpia e barit u zbulua kur policia theu dyert e pronës në rrugën Edmunds dhe gjeti Dedejn duke u përpjekur të ikte nga pjesa e pasme e shtëpisë. Brenda, kishte gjithsej 61 bimë kanabisi që rriteshin nën një varg llambash nxehtësie në dy dhoma. Vazot dhe dheu në dhomën e ndenjes tregonin dëshmi të një korrjeje të mëparshme.
Prokurori tha se bimët e kanabisit të sekuestruara do të kishin prodhuar rreth 3.5 kg drogë të klasës B. Droga mund të kapte vlerën e 18,000 £ nëse shitej në tregun me shumicë, por mund të kishte vlerën 45,000 £ nëse ndahej në sasi më të vogla për shitje në rrugë.
Avokatja e tij mbrojtëse tha se shqiptari ishte zhvendosur nga Shqipëria në Itali në moshën 9 vjeçare. Pasi përfundoi shkollimin e tij në një vend evropian, ai u trajnua si kuzhinier dhe më pas erdhi ilegalisht në Britaninë e Madhe. Shqiptari humbi punën si kuzhinier në Londër gjatë izolimit të pandemisë dhe u detyrua të hynte në tregtinë e drogës.
