Aktori Julian Deda ka treguar një episod me ish-kryetarin e Partisë Demokratike Lulzim Basha.
Ky i fundit e thirri të bëhej pjesë e kryesisë së forcës më të madhe politike opozitare në vend, por siç thotë artisti, Basha e mashtroi edhe pse e kishte thirrur vetë.
I ftuar në emisionin “Të Paekspozuarit”, Deda deklaroi se Basha ka patur një plan për shkatërrimin e PD si forcë politike.
Pjesë nga biseda:
Julian Deda: Ne kemi ecur tetë vjet në rërë, shumë e vështirë. Kemi mbështetur një person duke e ditur që ai nuk kishte për tu bërë kurrë një lider. Unë e kam thënë këtë edhe në 2017. Unë mendoj se e gjitha ishte një projekt, një plan nga ana e tij dhe çdo njeriu që ka mbështetur atë, për ta shkatërruar këtë forcë politike, për ta mbajtur gjithë jetën kështu siç është.
Ylli Rakipi: Atëherë i bie që Sali Berisha nuk paska qenë mirë, sepse mund ta ngrinte partinë në këmbë për ta hequr, jo pas dhjetë vjetësh…
Julian Deda: Kjo do të ishte më mirë të ndodhte që në 2017.
Ylli Rakipi: Ndoshta kështu i është dashur edhe doktorit. Pse pas dhjetë vjetësh e kuptoi ky?
Julian Deda: Epo tani iku kjo. Partia është në këtë situatë, nuk kthehemi dot mbrapa. Duhet të ishte bërë në 2017, kur u pa se po bëhej reprezalje në parti dhe mënyrën si i hoqi njerëzit dhe si i mashtronte. Dilnin nga zyra e tij 100 veta, dhe të gjithë ishin i dyti në Lezhë!
Ylli Rakipi: Ty të ka gënjyer ndonjëherë?
Julian Deda: Po patjetër. Më bie telefoni mua, Lul Basha2, kështu ia kisha shënuar, se kishte edhe të Hollandës. Isha në shtëpi, ora 3 e drekës. Alo! Po kryetar i them. Ku je mor burrë tha. Në shtëpi i tashë, jam me brekë po shoh film. Oooo tha, bravo bravo, a do vish të më takosh? Shkoj unë dhe e takoj. Më tha në 18:22, se këto orare caktonte ai.
Më thotë mua në zyrë, a do angazhohesh? I thashë si të angazhohem, unë vetëm brekët nuk i kam me logon e PD, se të gjitha i kam. Epo tha, do të bëjmë kryesinë e re dhe më duhesh të jesh aty. I thashë ok, po. Se e kishte edhe këtë ves, që thoshte i ofrova por nuk deshi. Që tja hiqja këtë, i thashë po.
Nejse më futi në garë dhe humba. Më thotë dikush atje, po ti nuk kishe bërë fare lobim? I thashë, po ca lobimi, unë isha me brekë në shtëpi, më mori më tha do futesh në kryesi, votimi ishte pas 3 ditësh. Pra kishte një mënyrë që të bënte ta urreje, duke qenë në shtëpi duke parë film. As i kërkoi njeri dhe as i tha njeri. Të merrte vetë dhe të gënjente.
