Komisioni për Veprimtarinë Prodhuese është mbledhur ditën e sotme për të diskutuar mbi ndryshimet në kodin rrugor për qarkullimin e mjeteve.
Duke folur në lidhje me këtë, deputeti demokrat Xhelal Mziu ka deklaruar se policia në vendin tonë vendos një numër rekord gjobash krahasuar me vendet e tjera. Ai tha se policët e pranojnë nën dhëmbë se duhet të vendosin një numër të caktuar gjobash, ndërsa shtoi se efektivët qëndrojnë në cep të rrugës për të kapur mat shoferët.
“Po të shkosh në një rrugë ke dy polici në dy anët. Është aq i madh numri i gjobave sa duhet të kemi vënë rekord botëror. Ne kemi shëtitur edhe jashtë vendit dhe të merr malli të shohësh policë. A mund të referohet një statistikë sa është numri i gjobave të vendosura në tre vitet e fundi nga policia e qarkullimit dhe nga bashkia.
Sepse në fund të fundit këto shkojnë te xhepi i qytetarëve. Unë në komunikim me policitë ato thonë nën dhëmbë se është i përcaktuar numri i gjobave që ata duhet të vendosin. Kjo është e dhimbshme. Policia e qarkullimit rrugor kthehen si kaçakë. Dalin te cepi i ferrës apo në një kthesë të padukshme”, deklaroi ai.
