“Babëzi e shfrenuar” PD denoncon kryebashkiakun e PS: Kërkon 6 makina me qira për vartësit

Sekretari i Përgjithshëm i Partisë Demokratike Flamur Noka ka akuzuar publikisht kryebashkiakun e Kamzës, duke thënë se ka babëzi të shfrenuar.

Sipas tij, bëhet fjalë për një kërkesë që lidhet me marrjen me qira për 3 vite të 6 makinave, me një vlerë mbi 221 milionë lekë të vjetra, fond që sipas tij duhet ta miratojë Këshilli Bashkiak.

DENONCIMI I NOKËS

Babëzia e shfrenuar e Rakip Sulit

Kryebashkiaku i emëruar i Kamzës i ka kërkuar Këshillit Bashkiak të miratojë një fond mbi 221 milionë lekë të vjetra për të marrë me qira 6 automjete për nevojat e vartësve të tij, për vetëm 3 vjet përdorim dhe më pas t’i kthehen përsëri pronarit. Kipja ka hedhur idenë se shkon më lirë t’i marrësh me qira sesa t’i blesh, ndërkohë që me një shpenzim të tillë mund të blihen 10 makina.

Ky propozim korruptiv i Rakip Sulit do të bënte krenar edhe grykësin Erion Veliaj, që njihet për skema të tilla hajdutërie.

Për më tepër, Bashkia Kamëz e njofton këtë propozim të Sulit si fakt të kryer, ndërkohë që Këshilli Bashkiak nuk ka asnjë vendimmarrje të shprehur. Rakip Suli, për nga babëzia, kryeson bindshëm renditjen e rilindasve të Ramës.

Vjedhje dhe vetëm vjedhje!

Vetëm hajduti e quan vjedhjen punë.