Gjykata e Dublinit në Irlandë ka dënuar një 27-vjeçar shqiptar.
Ai ka kaluar ilegalisht 12 bashkëkombës të tij për në Britaninë e Madhe.
Ndriçim Qema akuzohet për përfshirje në krimin e organizuar shqiptar në Irlandë që vepron në trafikun e qenieve njerëzore. Madje policia dhe prokuroria irlandeze ka zbardhur edhe skemën.
Ai i merrte deri në 10 mijë euro kujtdo që donte të hynte në Britaninë e Madhe përmes Irlandës. 27-vjeçari ishte pika kryesore e lidhjes së bandës shqiptare të krimit të organizuar. Ai kishte mbërritur në Irlandë në vitin 2018 dhe drejtohej kryesisht nga babai i tij, Fatmir Qema për të trafikuar njerëz drejt Britanisë së Madhe. I riu ishte i specializuar në gjetjen e dokumentacionit të rremë, por edhe në pastrimin e parave. Ndërsa 27-vjeçari Qema drejtonte trafikimin e njerëzve drejt Britanisë së Madhe, shefat e tij shqiptarë, prostituonin vajza dhe grabitnin dyqane. Banda përdorte më së shumti dokumente italiane pasi janë më të lehta për t’u falsifikuar ose kopjuar se shumica e vendeve të tjera evropiane.
Sapo mbërrinin në Irlandë në aeroportin e Dublinit, shqiptarët hidhnin dokumentet e tyre dhe kërkonin azil. Nga atje, ata silleshin në një hotel dhe qëndronin atje deri të nesërmen. Më pas Qema bënte dokumentacionin e ri të falsifikuar dhe organizonte kalimin e tyre për Britaninë e Madhe.
Qema u arrestua në një aeroport të Belfast-it në shtator 2019 teksa po tentonte të udhëtonte me dokumente të rreme me një tjetër shqiptar.
Ai ishte dëbuar më parë nga Britania e Madhe ndërsa telefoni i tij që u gjet në një makinë në një parking të aeroportit të Belfastit, nxori zbuluar rrjetin e kontrabandës së njerëzve të tij.
Telefoni përmbante 30 foto të letrave false të identitetit si dhe mesazhet mes Qemës dhe babait të tij në Shqipëri. Gjithashtu kishte edhe një mori mesazhesh mes Qemës dhe njerëzve në Shqipëri që kërkonin të vinin në Irlandë. Policia mësooi se ai kishte kontakte me elementë kriminalë në Spanjë dhe Britani, shkruan Irish Mirror.
Qema ka pastruar gjithsej 44 mijë midis vitit 2018 dhe 2020. Transfertat e parave janë përdorur në masë të madhe. Për të pastruar paratë, Qema përdori një sërë kartash identiteti false. Ndriçim Qema u dënua me 5 vjet burg.
