LIGJET E BIZNESIT
Nëse pyesni ndonjë person të martuar se si ishte përvoja e tyre me dasmën, është e sigurt që mes historive, do kenë edhe ndonjë ngjarje të çuditshme apo të pakëndshme. Është zakonisht një dajë që bëhet tapë, dikush që zihet me orkestrën dhe gjëra të tilla.
Ndërsa ne nuk mund të kontrollojmë gjithçka në jetën tonë, shumica e fatkeqësive në dasma duken të shkaktuara nga vetë natyra e ngjarjes. Dhe nuk është vetëm një “vjehrrë” e ardhshme që duhet të fajësohet. Më poshtë janë disa nga arsyet më të zakonshme pas atyre incidenteve që ndodhin rëndom në dasma:
1. Ndryshimi
Dasma është një ngjarje që simbolizon fundin e një stili jetese dhe fillimin e një tjetri. Bashkëshortët e mundshëm që kanë probleme me këtë ndryshim zhvillimi, për çfarëdo arsye, mund të veprojnë duke u tërhequr nga dasma në minutën e fundit. Nëse flisni me mjaft njerëz, do të gjeni një numër befasues individësh që janë lënë në altar nga një person i tillë. Për të shmangur martesën, disa partnerë janë larguar nga vendi ose janë zhdukur plotësisht.
Jo vetëm partnerët, por edhe prindërit ose të afërm të tjerë mund të përpiqen ta shkatërrojnë këtë “ndryshim”, me ose pa vetëdije. Për shembull, një nënë që është shumë e lidhur me fëmijën e saj mund të përjetojë ankth dhe probleme të tjera, gjatë gjithë kësaj periudhe ndryshimi.
2. Humbje
Ata që e perceptojnë martesën si një humbje personale mund të shfaqin pikëllim të pashprehur në një mënyrë të shtrembëruar ose të papërshtatshme. Për shembull, një grua që kishte humbur vajzën e saj në një aksident automobilistik disa vite më parë, u deh aq shumë në dasmën e mbesës së saj, sa filloi një sherr me nënën e mbesës (motrën e saj); ajo gjithashtu insistoi të udhëtonte në shtëpi nga dasma dhe ishte në një aksident të vogël automobilistik. Vetëm më vonë pranoi se dasmat i kujtonin humbjen e vajzës së saj dhe se donte të shpëtonte nga ato kujtime të tmerrshme sa më shpejt që të mundej.
3. Faji
Disa njerëz mund të ndihen fajtorë për humbjen e tyre dhe të ndëshkojnë veten për këtë; të tjerët rreth tyre janë thjesht “dëm kolateral”. Duke iu referuar rastit të mëparshëm, kur motra e gruas së dehur i tha se ajo mund të kishte përfunduar si vajza e saj – e vdekur nga një aksident automobilistik – gruaja tha se mendimi për të vdekur i jepte asaj shpresën se do t’i bashkohej të bijës në parajsë. Ajo shtoi se e “meritonte të vdiste gjithsesi”, sepse ishte ajo që po i jepte makinës kur ndodhi ngjarja. Disa e quajnë këtë “faji i të mbijetuarit”.
4. Zemërimi
Shpesh njerëzit kanë hatërmbetje me njëri-tjetrin. Këta familjarë të zemëruar, në një farë mënyrë mund të “hakmerren”, duke u ankuar për ushqimin, muzikën, vendin, fustanin e nuses dhe çdo gjë tjetër.
5. Zilia
Ziliqarët janë disa prej të fturave më të këqij në një dasmë. Mund të thuhen fjalë të rënda apo të jepen shikime urryese – që shpesh prishin gjithë atmosferën e krijuar.
Së fundmi, shumica e individëve të divorcuar dhe të ve do t’ju thonë se kanë frikë të marrin një ftesë për dasmë.
Dasmat janë ngjarje shumë emocionale që nënkuptojnë rritje dhe potencial, por ato gjithashtu hedhin dritë mbi plagë të ndjeshme që nuk janë trajtuar. Ndërsa qëndrojnë në pavetëdijen tonë, mbetjet e këtyre plagëve mund të rrëshqasin aq sa të krijojnë simptoma që edhe pa dashur, mund të prishin një nga ditët më të veçanta të dikujt.anabel
