Akil Kraja, ekspert për ekonominë, teksa ishte i ftuar në A2 Business me gazetaren Aurora Sulçe ku u diskutua për rritjen e inflacionit në 6,7%, u shpreh se një ndër arsyet kryesore është fakti që shteti nuk amortizon taksat.Eksperti renditi edhe kategoritë, që sipas tij, shteti duhet të ndërhyjë menjëherë, nga nafta te produktet e shportës.
“Ka një ndikim ndërkombëtar, për situatën e inflacionit në vend, por fakti që çmimi i naftës është sot 1 euro diferencë me rajonin do të thotë se forca e shtetit, për më tepër nëpërmjet këtyre komiteteve që e vendosin çmimin e tregut me forcë, është aty ku nuk duhet. Kemi një euro diferencë pasi prej vitesh ka një tarifë të rritur, në veçanti për taksat e qarkullimit, të cilat shkojnë te çmimi i naftës. Mjafton që shteti të ulë nivelin e taksave që faturohet direkt te nafta dhe ne menjëherë do të ulnim çmimin për shqiptarët, duke shkuar aq sa e ka rajoni.
Pika e dytë është energjia elektrike. Të mos harrojmë skandalet e njëpasnjëshme me keqmenaxhimin e kaskadës së Drinit, të cilat prodhimin e energjisë elektrike ia faturonim kompanive fantazmë, të cilat më pas e rrisnin deri në 40% çmimin. Mjafton që çmimi zinxhir i shitjes së energjisë elektrike të bëhet linear dhe ai do të ulet menjëherë.
Shkojmë në një inflacion tjetër, i cili nuk po përmendet shpesh, por është tërësisht shqiptar. Ai i aksesit në strehim. Ky ndikon në inflacion. Taksa e ndikimit në infrastrukturë, për shembull në Bashkinë e Tiranës, ka qenë 4% e vlerës së investimit, jo vetëm u dyfishua duke shkuar në 8%, por shkoi në 8% e vlerës së shitjes. Mjafton që ne ta ulim këtë taksë dhe çmimi i banesave në Tiranë nuk do të ishte stratosferik.
Po ashtu, ne jemi në të paktet vende që ka një TVSH universale, përfshirë edhe produktet e shportës. Mjafton thjesht që ne të bëjmë një TVSH të diferencuar për konsumin e shportës dhe menjëherë do të kishim një çmim më normal. Është shteti që nuk amortizon këto taksa”, tha Kraja.A2
