“Ndalo luftën” Legjenda e futbollit Pele i drejtohet Vladimir Putinit me një letër publike

Legjenda braziliane e futbollit Pele, i është drejtuar me një letër publike presidentit të Rusisë Vladimir Putin.

Në të flitet për luftën në Ukrainë, ku ylli i fushës së blertë i kërkon Putinit që ta ndalojë, pasi ky konflikt po sjell vetëm dhimbje, frikë, terror e ankth.

“Sot Ukraina po kërkon që të harrojë të paktën për 90 minuta dramën që ka përfshirë vendin e saj. Prandaj, dua të përfitoj nga fitorja e tyre në Skoci për të bërë një kërkesë direkte, të ndalohet pushtimi. Nuk ka absolutisht asgjë që të justifikojë këtë dhunë të vazhdueshme. Ky konflikt është i poshtër, i pajustifikueshëm dhe sjell vetëm dhimbje, frikë, terror e ankth.

Luftërat ekzistojnë për të ndarë kombet, por nuk ka asnjë ideologji të justifikueshme që predhat dhe plumbat të varrosin ëndrrat e fëmijëve, të ndajnë familjet dhe të vrasin të pafajshmit. Fuqia për të ndalur këtë konflikt është në duart e tua, në të njëjtën që shtrënguam aq përzemërsisht në Moskë, në takimin tonë të fundit në vitin 2017”, mbyll Pele postimin e bërë ndaj Vladimir Putinit.