LIGJET E BIZNESIT
Në një konferencë të përjavshme për mediat, ish-kryeministri Sali Berisha ka bërë thirrje që anëtarët e bordit për vendosjen e çmimeve të japin dorëheqjen, pasi veprimtaria e tyre është antikushtetuese.
Zhvillimi i dytë në të cilin u ndal Berisha është edhe ajo e refuzimit të rezolutës së deputetëve të PD-së për të dënuar gjenocidin serb në Kosovë.
“Organizatat prestigjoze kanë dhënë alarmin se 300 mijë fëmijë shqiptarë kërcënohen për ushqimin e tyre të përditshëm, Shqipëria nuk mund të ketë borde që të kontrollojnë tregun për llogari të qeverisë. I bëj thirrje anëtarëve të bordit që të japin dorëheqjen menjëherë, të mos bëhen vegël për këto shkelje kushtetuese.
Çështja e dytë është qëndrimi i Edi Ramës për gjenocidin në Kosovë, refuzimi nga qeveria aktuale, pseudomazhoranca për të denoncuar gjenocidin serb, është një akt makabër antikombëtar. Është një përdhosje, është një ekzekutim për herë të dytë i mbi 10 mijë grave dhe burrave të cilët u masakruan në suazën e operacionit Patkoi, që kishte për qëllim dhunën masive, masakrat dhe përzënien e shqiptarëve nga Kosova.
Ky akt i Edi Ramës dëshmon qartë se Tirana nuk është një gjë tjetër veçse një Beograd i vogël, ku interesat e Beogradit janë preferenca dhe përparësia e qeverisë së Tiranës, Kjo situatë po shkon drejt një drame të vërtetë, nuk ka patriot shqiptar, qytetar shqiptarë, që mund të pranojë rreshtimin e Tiranës me Beogradin gjatë qëndrimit serb në Kosovë”, tha Berisha.
