Dita ndeshjeje/ Shqipëria sfidon sot Islandën, Reja ka gati formacionin

Shqipëria do të nisë sot rrugëtimin në Ligën e Kombeve me një transfertë të largët si ajo e Islandës. Takimi do të luhet në qytetin e Reikjavikut në orën 20:45. UEFA ka zbuluar edhe arbitrin që do të vendosë drejtësi në këtë ndeshje. Ai është Kreig Pouson, një arbitër profesionist anglez që gjykon kryesisht në Premier Ligë, pasi është graduar në këtë nivel që prej vitit 2013.

Ndërkaq, trajneri Reja i ka fiksuar mirë lojtarët që do të hidhen si titullarë në fushë. Besnik i skemës 3-5-2, italiani pritet që ta rreshtojë Kombëtaren kështu: në portë Etrit Berisha dhe përpara tij, Ismajli, Kumbulla dhe Gjimshiti, ndërkohë krahët do t’i mbulojnë Balliu me Hysajn.

Në mesfushë mendohet të rikthehet pas shumë kohës Amir Abrashi, i cili do të shoqërohet nga Gjasula dhe Çekiçi, ndërsa në sulm Uzuni dhe Cikalleshi, të palëvizshëm si pikë referimi, pritet t’i bashkohet Seferi që ndryshe nga Vrioni, përfiton për shkak të tipareve të ndryshme si sulmues.