Sistemit arsimor 9-vjeçar i shtohet edhe një javë pushim/ Miratohet struktura e re

Ministrja e Arsimit, Evis Kushi ka bërë me dije se për vitin e ri arsimor, sistemit 9-vjeçar i shtohet edhe një javë pushim.

Kjo pas miratimit të strukturës së re e vitit shkollor 2022-2023 në sistemin arsimor parauniversitar, urdhrit të përbashkët të Ministrisë së Arsimit dhe Sportit, si dhe e Ministrisë së Financave dhe Ekonomisë për arsimit profesional.

Ministrja e Arsimit dhe Sportit Evis Kushi njofton se për arsimin 9-vjeçar vjen një ndryshim në numrin e ditëve të pushimit pas periudhës së dytë mësimore.

“Ju njoftoj se sapo nënshkruam strukturën e vitit të ri shkollor 2022-2023 për të gjithë arsimin parauniversitar, i cili fillon më datë 12 shtator 2022.

Për nxënësit dhe mësuesit e arsimit 9-vjeçar lajmi i mirë është se vitin e ardhshëm do të kenë edhe një javë më shumë pushim pas periudhës së dytë mësimore, nga data 3-9 prill 2023. Në këto ditë nxënësit do të pushojnë por edhe luajnë dhe argëtohen për të marrë energji të reja për periudhën e fundit, ndërsa mësuesit do të kenë më shumë kohë për vlerësimet e nxënësve dhe përgatitjet në vijim.”,ka njoftuar ajo.