Debati publik mbi pagat është rikthyer, 5 muaj pasi databaza me pagat e mbi 600 000 personave u bë publike. Teksa në atë kohë rrjedhja e informacionit evidentoi lehtësinë e aksesimit të të dhënave personale dhe informalitetin e lartë në paga, kryeministri Edi Rama deklaroi pak ditë më parë se pagat nuk do të jenë sekrete dhe publikimi i tyre do të bëhet një herë në vit.
A mund të luftohet kështu informaliteti? Sipas ekspertëve, ka mekanizma të tjera për ta bërë këtë gjë.
I ftuar në “A2 Business” me Aurora Sulçen, eksperti i ekonomisë, Maksim Caslli, deklaroi se “publikimi i pagave është i jashtëligjshëm”.
“Një gjë e tillë shkakton shumë probleme në biznes dhe nuk besoj se do të shkojë deri në fund. Ka forma të tjera për të luftuar informalitetin”, theksoi Caslli.
Niko Lera, drejtor i politikave fiskale në Ministrinë e Financave, tregoi mënyrat se si ulet informaliteti në ekonominë tonë.
“Informaliteti ulet duke rritur ndërgjegjësimin e punëmarrësve dhe punëdhënësve apo duke forcuar mekanizmat e kontrollit. Ka evazion dhe fshehje pagash, por kemi zhvillime pozitive në këtë fushë”, tha Lera.
Për ekspertin e ekonomisë, Flobenc Dilaveri, “publikimi i pagave është thjesht një spektakël, që njerëzit të shikojnë njëri-tjetrin dhe të merren sa merr njëri e sa merr tjetri, duke harruar qeverisjen”.
“Nuk e kuptoj se çfarë e mire do t’i vinte administrimit fiskal nga publikimi i pagave”, theksoi Dilaveri.
Ndërsa, sipas Arben Shkodrës, Sekretar i Përgjithshëm i Shoqatës së Prodhuesve, deklarata e kryeministrit për publikimin e pagave “tërheq vëmendjen nga situata ku jemi, ku kemi probleme shumë të thella me punësimin”.
“Po merremi me batutën e nxjerrjes së pagave në shesh. Paga është politikë e brendshme e çdo kompanie. Përveç pagës minimale të përcaktuar me dhunë nga shteti, çdo sipërmarrës i vendos pagat në bazë të produktivitetit të kompanisë së tij. Kur dalin pagat, krijohet një anomali e brendshme. Gjithashtu, kryeministri po i jep të drejtë tani atyre që e piratuan databazën”, u shpreh Shkodra.
Për ish-zv/ministrin e Financave, Elton Haxhi, “absolutisht nuk duhen publikuar pagat”.
“Nuk jam dakord me këtë ide. Paga i jepet organit tatimor për llogaritjen e kontributeve dhe i jepet në mirëbesim vetëm për këtë qëllim. Nuk mund të bëhet publik ky informacion për qëllime të tjera”, nënvizoi Haxhi.A2
