Po përhapet me shpejtësi, Spanja regjistron 23 raste të reja të lisë së majmunëve

Në Spanjë janë regjistruar 23 raste të reja të lisë së majmunëve. Ditën e premte u zbuluan nëntë raste të reja.

Autoritetet e Madridit po punojnë për të mbikëqyrur rastet të cilat rrjedhin kryesisht nga një epidemi e vetme në sauna, u shpreh të premten shefi rajonal i shëndetësisë Enrique Ruiz Escudero.

“Departamenti i shëndetit publik do të bëjë një analizë edhe më të detajuar… për të kontrolluar infeksionin, për të thyer zinxhirët e transmetimit dhe për të zbutu sa më shumë transmetimin e këtij virusi”, tha ai.

Në Spanjë janë nën hetim po ashtu edhe 18 raste të tjera të dyshuara, 15 në rajonin e Madridit, dy në Ishujt Kanarine dhe një në Andaluzi, theksojnë autoritetet shëndetësore.

Në Evropë, tanimë janë raportuar më shumë se 100 raste të infeksionit viral, që është më i zakonshëm në Afrikën Perëndimore dhe Qendrore.

Zakonisht është një infeksion i lehtë, me simptoma që përfshijnë temperaturë, dhimbje koke si dhe një skuqje karakteristike me gunga.

Në Britani janë zbuluar 20 raste dhe autoritetet po ofrojnë një vaksinë kundër lisë për punonjësit e shëndetësisë dhe të tjerët që mund të kenë qenë të ekspozuar.

Spanja po bën vlerësimin e terapive të ndryshme, si ilaçet antivirale dhe vaksinat, por deri më tani rastet kanë simptoma të lehta dhe për këtë arsye nuk ka nevojë për trajtim specifik, tha të premten ministrja spanjolle e Shëndetësisë, Carolina Darias.