“Më shau nga familja” Flet polici që ekzekutoi kolegun në Tiranë: Konsumonte alkool, e kam duruar gjithë kohës

Zbardhet dëshmia që efektivi i policisë Ludian Zaimi, që vrau kolegun e tij Çaush Saliasi ka dhënë para autoriteteve.

Ngjarja ndodhi në ambientet e komisariatit numër 3 në Tiranë.

25-vjeçari ka deklaruar se me viktimën ka pasur përplasje herë pas here, dhe sipas tij 55-vjeçari e shante dhe ofendonte vazhdimisht. Ai thotë se ditën që ndodhi ngjarja 55-vjeçari e ka ofenduar nga familja dhe se nuk ka duruar dot dhe e ka qëlluar.

Po ashtu polici ka shfaqur pendesë për krimin e kryer.

“Po bënim instruktazhin në momentin kur ndodhi ngjarja. Çaushi vijoi me përsëritjen e fjalëve dhe veprimeve fyese ndaj meje, me shau nga familja dhe ofendime te tjera, nuk durova dhe e qëllova. Jam përplasur edhe më herët me të, edhe në kohën kur kemi qenë në krye të detyrës, pasi me ofendonte shpesh. Konsumonte alkool dhe shfaqte sjellje denigruese ndaj meje dhe e kam duruar gjate gjithë kohës. Jam penduar për veprimin që kam bërë, ishte moment dobësie dhe mungese të vetëpërmbajtjes nga ana ime”, ka thëne 25-vjeçari.