Gruaja mjeke, i shoqi drejtor/ Çifti që u aksidentua nga shoferi i makinës luksoze “G Class” u bënë prindër pas 20 vitesh

Aksidenti që ndodhi dje në Rrugën e Kavajës në Tiranë për pak sa nuk rezultoi fatal.

Në afërsi të kompleksit “Delijorgji”, Ajas Sulejmani, shoferi i makinës luksoze “G Class” kaloi kryqëzimin me semafor të kuq dhe shpejtësi skëterrë, ndërsa përplasi rëndë, familjen Konomi, konkretisht çiftin Vilma dhe Arjan si dhe foshnjën e tyre 3 muajshe.

Të tre anëtarët u transportuan në spital ku fëmija mori vetëm një gërvishtje të lehtë në faqe, teksa çifti i bashkëshortëve po trajtohen për politraumë. Përsa i përket shoferit, Ajas Sulejmani njihej si person që nuk respektonte rregullat e qarkullimit rrugor dhe është kapur dy orë më vonë në një spital privat.

Ndërkohë pas ngjarjes mësohet se Vilma dhe Arjan Konomi, çifti që u përplas me makinë nga Sulejmani, ishin bërë prindër pas 20 vitesh martesë. Sipas mediave, Arjan Konomi është me profesion, drejtor arsimi në Ministrinë e Arsimit, ndërsa Vilma është mjeke pediatre në Kombinat. Arjani ka thyerje të legenit dhe fraktura të tjera, ndërsa Vilma kishte hemorragji të brendshme dhe ndodhet në gjendje stabël në pavion.