Emri më i ri/ Poet dhe ish-ambasador, kush është kandidati i mundshëm për postin e Presidentit

Kanë nisur procedurat parlamentare për zgjedhjen e Presidentit të ri.

Ndërkohë emri që po qarkullon së fundmi në ambientet e politikës është ai i poetit, ish-ambasadorit, të dënuarit politik, intelektualit Visar Zhiti.

Duket se kjo kandidaturë mund të gjejë mbështetjen e të gjithë krahëve të politikës shqiptare.

Nuk kanë qenë të paktë emrat që kanë qarkulluar si ai i Majlinda Bregut, Servet Pëllumbit, Princ Lekës, Mimi Kodhelit, apo dhe ambientalistit Sazan Guri.

Visar Zhiti, njeriu i qetë në politikë dhe rebel në art dhe kulturë, u propozua në vitin 2015 nga Kryeministri Rama si ambasador në Vatikan, propozim që nuk u pranua nga ish-Presidenti Bujar Nishani, me argumentin se Rama nuk është konsultuar me të përpara se ta propozonte. Zhiti para se të vinte e majta në pushtet në vitin 2013, ka qenë për disa muaj ministër i Kulturës në qeverinë e Sali Berishës.

Më pas, ai shërbeu në Vatikan si i dërguari me punë. Visar Zhiti nuk është pa eksperiencë në diplomaci. Në vitin 1997, Zhiti u emërua atashe kulturor në Ambasadën shqiptare në Romë, ku qëndroi deri në vitin 1999. Ai mban gradën diplomatike “këshilltar”.

Presidenti i Republikës është shprehur se nuk do të dekretojë Visar Zhitin për ambasador për shkak se ka munguar konsultimi i Kryeministrit Rama me të, duke e anashkaluar institucionin e Presidentit në lidhje me dekretet për ambasadorët.