Kryetari i grupit parlamentar të PD-së, Enkelejd Alibeaj ka thirrur në orën 14:00 një mbledhje të deputetëve për të diskutuar lidhur me procedurën e zgjedhjes së Presidentit të ri të vendit.
Një ditë para mbledhjes ai u ka shpërndarë deputetëve një draft me kriteret si dhe formulën e zgjedhjes së Presidentit, ku vë në dukje faktin se materiali nuk është përfundimtar si dhe mund të ndryshojë në varësi të propozimeve të deputetëve.
“Duke shpresuar të keni kaluar sa me mire ne fundjave, po ju shkruaj per mbedhjen e radhes se grupit. Sic u bisedua, ju lutem gjeni bashkelidhur dokumentin, ku jane sintetizuar me kujdes diskutimet qe beme ne mbledhjen e fundit, si dhe mendimet e derguara me email nga disa prej jush. Vini re ju lutem qe dokumenti eshte ende draft, dmth eshte i hapur per t’u permiresuar, korrigjuar dhe shtuar per mbledhjen e neserme. Po jua dergoj qe sot me qellim qe secili prej jush te kete mundesi efektive per ta analizuar dhe per te kontribuuar ne permiresimin e tij”, thuhej në emailin e shpërndarë më herët nga Alibeaj.
Mbledhja e sotme do të tregojë sërish se çfarë raportesh ka sot në PD, pasi Komisioni i Rithemelimit ka vendosur të mos jetë i pranishëm.
Deputetët e Komisionit të Rithemelimit konfirmuan se nuk do të bëhen pjesë e “këtij teatri”, siç e quajtën ata mbledhjen e thirrur nga Alibeaj.
Në mbledhjen e fundit të thirrur nga Alibeaj rezultoi se 22 deputetë ishin të pranishëm, ndërkohë që 17 të tjerë janë pozicionuar me Komisionin e Rithemelimit dhe pjesa tjetër nuk janë pozicionuar me asnjërën palë.
