Presidenti i ri i Shqipërisë, profilet që kërkon Kryeministri, Alibeaj flet për një kandidat

Kryeministri Edi Rama përjashtoi një ditë më parë çdo mundësi që Presidenti i ri i vendit të zgjidhet nga radhët e grupit parlamentar socialist.

Në mbledhjen e Kryesisë së PS, mësohet se kryeministri Rama ka deklaruar se emri për Presidentin e ri nuk duhet të identifikohet me Partinë Socialiste dhe se prioritet do t’u jepej atyre të cilët vijnë nga diplomacia dhe jeta akademike.

“Kreu i ardhshëm i shtetit të mos jetë identifikuar me PS. Prioritet për kandidaturën i jepet atyre qe vijnë nga diplomacia dhe jeta akademike”, mësohet të jetë thënë në mbledhje.

Mirëpo, ditën e sotme, kreu i grupit parlamentar demokrat, Enkelejd Alibeaj foli për një President me profil politik.

“Duhet të jetë një president jo i afektuar nga votat non-grata. Duhet të zgjidhet një profil politik, këto janë sugjerime të mijat. Duhet të jetë një një njeri i ekuilibrave, që ka treguar se përballet me dinjitet testeve politike. Procesi i zgjedhjes së Presidentit të Republikës të jetë serioz, që mos të ngutemi. Jam i mirë në matematikë! Nuk është çështje numrash, por procesi, një proces gjithëpërfshirës. Ky Parlament nuk duhet ta zgjedh nga gjiri i vetë përmes pazareve dhe kulisave, por përmes procesit transparent. Këto janë synime hyjnore, ky është testi që kemi të gjithë. Nuk është çështje numrash, por legjitimitet”, u shpreh Alibeaj.

Alibeaj vijoi duke thënë: Ja si do të zhbëjmë numrat e mazhorancës në Parlament

Kreu i grupit parlamentar të PD, Enkelejd Alibeaj, tha se ka marrë leksione nga e kaluara në diskutimet me PS dhe nuk do të ketë më marrëveshje të thjeshta. Ai theksoi se Presidenti i ri duhet të jetë një figurë e denjë për atë rol dhe për këtë do të nisin diskutimet, edhe me publikun. Kjo sipas tij do të jetë çelësi për të “sfumuar” numrat në parlament që ka mazhoranca.

“Janë leksione nga të cilat kemi nxjerrë mësime. Nuk duhet të ndodhë më. Do të marrim pjesë në proces duke paraqitur propozimet tona, do i qëndrojmë fort atyre. Ne do të bëjmë këtë gjë, ta tejkalojmë konceptim e numrave, duke i treguar shqiptarëve se cili duhet të jetë profili i presidentit të shqiptarëve. Cila do të jetë sjellja e palës tjetër? Nuk e di nëse ka një kuriozitet, por ngutja që po bëhet tregon që po tradhtojnë veten. Një alternativë është që meqenëse ka numrat ne të ikim sikur s’bëhet asgjë. Këtë kërkon Rama, por nuk biem në këtë kurth. Duhet të bëjmë propozimet dhe të diskutojmë me publikun. Ka ai kurajo të thotë se çfarë bëhet me dizenjimin non grata. Që këtu fillon në mënyrë të mbarë. Duhet një njeri që nëse do të jetë rasti për të pasur teste me problematikat institucionale të di të jetë në lartësinë e Presidentit të Republikës, kjo është ajo që duhet”, tha Alibeaj.