Arrestohet në Tiranë nga efektivët e komisariatit nr.3 shtetasi Arben Dani.
Mësohet se ai është i punësuar si shofer i ish-deputetit të Partisë Socialiste Ilir Beqja, i cili mban aktualisht postin e Drejtorit të Agjencisë së Ndihmave dhe Donatorëve.
Sipas informacioneve, Dani u ndalua më 17 prill, pas një kallëzimi të depozituar në polici nga qytetarja M.M. Kjo shtetase ka pretenduar në denoncimin e dhënë në polici se komshiu i saj në pallat, e ka përndjekur dhe ngacmuar seksualisht për një kohë të gjatë.
Për ti dhënë fund kësaj situate, gruaja ka vendosur ti drejtohet komisariatit Nr.3, duke depozituar një kallëzim penal ndaj Arben Danit. Pas denoncimit në polici është thirur për tu pyetur, Arben Dani, i cili më pas është arrestuar duke u akuzuar për veprën penale të “Përndjekjes”.
Dani ka dalë die para gjykatës së Tiranës, ku fillimisht prokurori i çështjes ka kërkuar caktimin e masës së “arrestit në burg”. Por pas depozitimit të disa provave materiale nga ana e avokates mbrojtëse, si fotografi dhe gjëndjen e punësimit të të arrestuarit, prokuroria ka mbajtur qëndrim tjetër në sallën e gjyqit,duke i kërkuar gjykatës caktimin e masës ë arrestit në shtëpi për Arben Dani.
Kjo kërkesë e përfaqësuesit të akuzës, është pranuar nga gjykata e Tiranës, duke urdhëruar që shoferi i socialistit Ilir Beqja, të lirohet nga qelia dhe të qëndrojë me masën e sigurisë “arrest shtëpie”.
Në dosjen hetimore thuhet se Dani në mënyrë të vazhdueshme ka përndjekur M.M, e cila është banore në të njëjtin pallat ku banon dhe personi i arrestuar. Çështja vijon të qëndrojë ende në hetim nga prokuroria e Tiranës, ndërsa pritet që në ditët në vijim të ketë një qartësim të plotë të përgjegjësisë penale të Arben Danit.
