Pas mbledhjes së Komisionit të Rithemelimit në selinë e PD, ka folur ish-kryeministri Sali Berisha.
Ai u pyet nëse PD rrezikon shpalljen “non-grata” nga SHBA, nëse zgjedh të kandidojë për kryetar të kësaj force politike.
Berisha ka thënë se as ambasadorja Yuri Kim dhe as kreu i qeverisë Edi Rama nuk ka e s’do të kenë kurrë tagër të caktojnë kryetarin e PD.
Pyetje: A rrezikon PD shpalljen “non grata” nga SHBA me ju në krye?
Sali Berisha: Kryetari i PD u shkarkua në datën 11 dhjetor me votat 4446 vota të delegatëve e 44 mijë vota të anëtarëve të saj më 18 dhjetor.
Përveç anëtarëve të PD me votën e lirë, asnjë njeri cilido qoftë ai, as guvernatorja as Zeusi Rama nuk ka e s’do kenë kurrë tagër të caktojnë kryetarin e PD.
Një përpjekje e dështuar si e kam vlerësuar për të ndërhyrë në shkelje flagrante të Konventës së Vjenës e sovranitetin e një force të lirë politike.
Kam pasur rastin të dërgoj mesazhin e përsëris publikisht këtu se kurrë as kryetarin e as kryesinë s’do mund të caktojë kush për këtë parti përveçse anëtarësia e saj.
A do vijoni ta njihni Enkelejd Alibeajn si kryetari i grupit parlamentar?
Sali Berisha: Ai është kryetari i grupit parlamentar, natyrisht grupi parlamentar drejtohet nga Kryesia e grupit parlamentar. Kërkesa e vetme është kjo që vendimet për drejtimin e grupit që është politik të merren nga kryesia e grupit e në raste të caktuara komisioni i Rithemelimit mund të ndërhyjë pa asnjë lloj mëdyshje por s’kemi arsye se linja jonë politike është e qartë.
